पर्वत । अहिले नेपाल सरकारका अर्थमन्त्री विष्णु पौडेलले आर्थिक वर्ष २०७८÷७९ को बजेट भाषण सुनाइरहेका छन् ।सरकारको बजेटलाई लिएर विभिन्न खालका टीकाटिप्पणीहरू सुरु भइरहेका छन् ।
कसैले विगतका सरकारको भन्दा ज्यादा जनमुखी भनिरहेका छन् भने कतिले कानलाई सुन्नको लागि मात्र राम्रो भएको तर महसुस गर्न नसकिने खलको बजेट भएको बताइरहेका छन् ।
यता नेपाली काँग्रेसका केन्द्रीय सदस्य अर्जुन प्रसाद जोशीले चाहिँ पर्वतमा बन्ने भनिएको रेलको स्टेसनका बारेमा चिन्ता व्यक्त गरिरहेका छन् ।
गएको चुनावी अभियानमा आफ्ना उम्मेदवार पदम गिरीलाई भोट माग्न प्रधानमन्त्री केपी शर्मा ओली सदरमुकाम कुस्मा आएका थिए ।
कार्यकर्ताको भिड्लाई चुनावी सम्बोधन गरेका वलीले अबको तीन वर्षभित्र रेल आउने बताएका थिए ।
‘केरुङ–काठमाडौँ, काठमाडौँ–पोखरा रेल’, वलीले भने, ‘पोखरा सम्म रेल आएपछि बेनी सम्म रेलका लागि त केही भन्नुपर्दैन होला, बेनी रेल जाने भएपछि त्यसको स्टेसन कुस्मा रहने छ, कुस्मा त स्टेसन नै हुन्छ ।’
यही भाषणलाई लिएर केन्द्रीय सदस्य जोशीले आफ्नो फेसबुक मार्फत आफूले बजेट भाषण सुन्न नपाएको भन्दै रेलको स्टेसन कहाँ बन्ने भएछ भन्दै ठट्यौली पारामा व्यङ्ग्य गरेका हुन् ।
