Home पत्रपत्रिका ‘जडिबुटी र तातोपानीले कोरोना जितिन्छ भन्ने भ्रमले नेपालमा ठूलो क्षति हुनसक्छ’

‘जडिबुटी र तातोपानीले कोरोना जितिन्छ भन्ने भ्रमले नेपालमा ठूलो क्षति हुनसक्छ’

by ईलालटिन
0 comment

नेपालकै छैटौँ कोरोना संक्रमित बागलुङ नगरपालिका-३ की ६५ वर्षीया मनकुमारी पौडेलले कोरोनामुक्त भएर अस्पतालबाट बाहिरिने क्रममा भनेकी थिइन्, ‘मैले आत्मबल र तातोपानी खाएरै कोरोना जितेँ।’

धौलागिरि अस्पतालको आइसोलेसनमा उपचार गरेकी उनलार्य दुई हप्ताको बीचमा एक दिन उच्च रक्तचाप बाहेक कुनै पनि औषधिको प्रयोग गर्नुपरेन। चैतमा पहिलो पटक देखिएका दुई सङ्क्रमितको एकै स्वर थियो, ‘स्वास्थ्यकर्मीको व्यवहार, आफ्नो आत्मबल र खानपानको व्यवस्थापनले नै कोरोना जित्यौँ।’

आइतबार दिउँसोसम्म बागलुङमा सङ्क्रमितको सङ्ख्या २८६ पुगेको छ। तीमध्ये २६१ जना आइसोलेसनमा बसेर निको भएपछि घर फर्किएका छन्। कोरोनाका कारण एक जनाको मृत्यु भएको छ। निसीखोलाका पुरुषमा मृत्युपछि कोरोना सङ्क्रमण रहेको पुष्टि भएको थियो।

जिल्लाका आइसोलेसन र प्रि–आइसोलेसनको तथ्याङ्कअनुसार निको भएका अधिकांशमा कोरोना सङ्क्रमणको लक्षण नै थिएन । उनीहरु कसैले पनि न त खोपको प्रयोग गरे न औषधि नै।

सबैले भन्ने एउटै हो, ‘ढुक्कले बसेँ, समाचार पढेँ, तातोपानी खाएँ, कोरोना जितेँ।’ यद्यपि आइसोलेसनमा बसेर तातोपानी खाँदैमा वा आत्मबल बढाउँदैमा कोरोना नजितिने विशेषज्ञको धारणा छ।

‘कोरोना निको हुन्छ। ९८ प्रतिशतमा ग्यारेन्टीका साथ निको हुन्छ त्यसमा दुईमत रहेन’, अमेरिकामा रहेका जीवाणु वैज्ञानिक (भाइरोलोजिष्ट) सुदीप खड्का भन्छन्, ‘कोरोनाको न त कुनै औषधि प्रमाणित छ न खोप, तातोपानी र आत्मबलले निको हुने रोग होइन, खेलबाड नगरौँ।’ खड्का इबोला भाइरसको सुई पत्ता लगाउने वैज्ञानिकमध्येको एक हुन्।

लक्षण नदेखिएका अधिकांश बिरामी निको हुने भएकाले तातोपानी, आत्मबल र जडीबुटीको भ्रम परेको उनको जिकिर छ। ‘कोरोना लागे पनि तातोपानीले जितिन्छ भनेर भ्रममा नपरौँ, यो गलत हो’, खड्का भन्छन्, ‘यस्तो भ्रममा परियो भने लक्षण भएका र जोखिममा रहेका बिरामीलाई कठिन हुन सक्छ।’

अरु भाइरसभन्दा कोरोनाको फैलावट धेरै भएकाले यो रोगसँग खेलबाड गर्न नहुने उनको तर्क छ। नेपालमा पछिल्लोपटक समुदायमा फैलिएको सङ्क्रमणले थप खतराको सङ्केत गरेको भन्दै इबोलाभन्दा कम मृत्युदर भएको कोरोनाले धेरैको मृत्यु निम्त्याउन सक्ने उनले चेतावनी दिए।

‘एक तिहाइ मान्छेलाई यसको लक्षण नै देखिँदैन, जुन खतरनाक हो,’ खड्काले भने, ‘अहिले हामीले सबै निको हुन्छ भनेर हेलचेक्र्याईं गर्दा दुई प्रतिशतमा पर्ने उमेर पुगेको समूहलाई निकै कठिन हुन्छ।’ कोरोनाको औषधि वा खोप तयार भएर तत्काल आउने सम्भावना नरहेको समेत उनले बताए।

रासससँगको टेलिफोन संवादमा खड्काले भने, ‘इबोलाको खोप सबैभन्दा छोटो समयमा बनेको हो, जसका लागि दुई वर्ष लाग्यो।’ कोरोनाका तयार भएका खोप तेस्रो परीक्षणमा रहेको भए पनि त्यसको उपलब्धता अझै कठिन रहेको उनले बताए। ‘खोप बने पनि त्यसको उत्पादन सबैलाई पुग्ने गरी बनाउन कति समय लाग्ला। त्यसैले हामीले सतर्कता अपनाउनुको विकल्प नसोचौँ,’ उनले भने।

विदेशमा जस्तो नेपालमा सङ्क्रमण फैलिँदैन भनेर चलेका हल्लासमेत भ्रम भएको भन्दै उनले आगामी दिन थप खतरनाक भएको सङ्केत गरे। अस्पताल, भेन्टिलेटर र आइसियु लक्षण भएका बिरामी र कोरोनाका कारण कठिन अवस्थामा रहेका बिरामीको लागि तयार राख्नुपर्ने खड्काको सुझाव छ।-नेपालखबर

सम्वन्धित समाचार

प्रतिक्रिया दिनुहोस्

लाल्टिन मिडिया प्रा.लि.द्वारा सञ्चालित
अध्यक्ष : अच्युत तिवारी
प्रबन्ध निर्देशक: सुमन जंग
प्रबन्धक: संगीता केसी
सम्पादक : मञ्जु भुसाल तिवारी

सम्पर्क

सूचना विभाग दर्ता नंः २३२९ /०७७- ७८
Kushma Parbat, Nepal
+977-67-422202 +977-9857672277
[email protected]
[email protected]

धेरै प्रतिकृया आएका

भर्खरै

Copyright © 2024 Elaltin.com