लन्डन । नेपाली नागरिकता निरन्तरता र प्रस्तावित गैर आवासीय नेपाली ऐनको सम्बन्धमा प्रवासी नेपाली एकता मञ्च बेलायतले आइतबार एक अन्तरक्रिया कार्यक्रमको आयोजना गरेको छ । नेपाल सरकारका आधिकारिक ब्यक्तित्वहरुको उपस्थितिमा कार्यक्रम सम्पन्न भएको हो । सरकारी अधिकारीहरुसँग अन्तरक्रिया भएको छ । नेपाल सरकारले गैर आवासीय नागरिकता ऐन तयार गरि सम्बन्धनका लागि संसदमा दर्ता भइसकेको अवस्थामा प्रवासी नेपाली एकता मञ्च बेलायतले नेपाल सरकारका आधिकारिक ब्यक्तित्वसंग अन्तरक्रिया गरेको हो । अन्तरक्रियामा राष्ट्रिय सभाका अध्यक्ष गणेश प्रसाद तिमल्सिना, पूर्व कानूनमन्त्री शेरबहादुर तामाङ, कानून न्याय तथा मानव अधिकार समितिका सभापति कृष्ण भक्त पोख्रेल, एनआरएनए अन्तर्राष्ट्रिय समन्वय परिषदका महासचिव हेमराज शर्मा तथा एनआरएनए यूके अध्यक्ष पुनम गुरुङ प्रमुख अतिथी एवं विशेष अतिथीका रूपमा उपस्थित थिए । कार्यक्रममा गैर आवासीय नेपाली ऐन बनाउन शुरु देखि नै खटिरहेका पूर्व कानूनमन्त्री शेर बहादुर तामाङले गैर आवासीय नेपालीप्रति सम्मान व्यक्त गर्दै ऐनका लागि कुनै पनि बाधा नभएको बताए ।
अन्तरक्रिया कार्यक्रमका संयोजक एवं उपमहासचिव डा मुकुन्द बस्तोलाले कार्यक्रम सञ्चालन गरेका थिए ।‘एक पटकको नेपाली सदाका लागि नेपाली नागरिक’ भन्ने मुल नारा बोकेर हिंडेका गैरआवसीय नेपालीहरु प्रस्तावित ऐनले संशकित भइरहेका बेला कार्यक्रमले विदेशमा रहेका नेपालीहरुको लागि थप जानकारी मिलेको बताइएको छ । लामो समयदेखि प्रतिक्षारत नेपाली नागरिकता निरन्तरताको अभियान विदेशस्थित थुप्रै नेपालीको चासोको विषय बन्दै आएको छ । नेपालमा हुने गरेको राजनैतिक द्वन्दका कारण पनि यो विषय ओझेलमा पर्दै आएको धेरैको बुझाइ छ । रातोपाटी ।
