काठमाण्डौं । प्रहरी पोसाकको दुरुपयोग भएको भन्दै प्रहरी प्रधान कार्यालयले बिहीबार एक विज्ञप्ति जारी गरेको छ । फिल्म, टेलिश्रृङ्खला लगायतमा प्रहरी पोसाकको दुरुपयोग भएको भन्दै विज्ञप्ति जारी गरिएको हो ।
स्वीकृति नलिई नेपाल प्रहरीले प्रयोग गर्ने पोसाक र पोसाकमा प्रयोग हुने दज्यार्नी चिन्ह, प्रहरीको मोनोग्राम प्रयोग नगर्न समेत आह्वान गरेको छ । यी नियम तोडेमा प्रचलित कानुन बमोजिम कानुनी कारबाही हुनेसमेत कार्यालयले सार्वजनिक गरेको विज्ञप्तिमा उल्लेख गरिएको छ ।
‘विभिन्न चलचित्र, टेलि चलचित्र, सर्ट फिल्म, प्र्यांक भिडियो, साङ्गीतिक भिडियो, टिकटक भिडियोलगायत टेलिभिजन तथा स्टेज कार्यक्रमहरूमा नेपाल प्रहरीले प्रयोग गर्ने विभिन्न पोसाकहरूको दुरुपयोग भइरहेको सम्बन्धमा प्रहरी प्रधान कार्यालयको ध्यानाकर्षण भएको जनाइएको छ ।
यस निर्णयसँगै अब प्रहरी पोसाकको प्रयोग गर्नुअगाडि प्रहरी प्रधान कार्यालय नक्सालस्थित जनसम्पर्क तथा प्रचार-प्रचार इकाईमा प्रयोजन खुलाई स्वीकृति लिनुपर्ने प्रावधान पूरा गर्नुपर्ने छ ।
