पर्वत । पर्वतको कुश्मामा १ लाख राशिका दोस्रो “अनिस बोगटी स्मृति कप”सेभेन ए साइड फुटबल प्रतियोगिताको उपाधि बागलुङ सुधार केन्द्र बागलुङले जितेको छ ।
वैशाख ८ गतेबाट कुश्मामा सञ्चालित प्रतियोगिताको हिजो भएको फाइनल खेलमा बागलुङले उपाधि जित्दै १ लाख रुपैयाँ हात पारेको हो ।
पर्वत फुटबल क्लबले आयोजना गरेका प्रतियोगितामा उपविजेता चाहिँ कालीपुल बेनी म्याग्दी भएको छ । उसले ५० हजार रुपैयाँ प्राप्त गरेको छ ।
क्लबका पूर्व खेलाडी अनिस बोगटीको स्मृतिको अवसरमा प्रत्येक वर्ष प्रतियोगिता गरिने लक्ष्य अनुसार दोस्रो “अनिस बोगटी स्मृति कप”सेभेन ए साइड फुटबल प्रतियोगिता आयोजना गरिएको क्लबका अध्यक्ष गणेश सिलवालले बताए । उनले खेलकुद क्षेत्रको प्रवर्द्धनसँगै साथीको सम्झनामा प्रतियोगिता आयोजना गरिएको बताए ।
प्रतियोगितामा वेस्ट प्लेयर,सर्वाधिक गोल कर्ता,वेस्ट किपर, वेस्ट डिफेन्डर र वेस्ट स्टाइगरलाई समेत पुरस्कार प्रदान गरिएको छ । फुटबल प्रतियोगितामा पोखरा, पाल्पा लगायतका ठाउँका २२ टिमको सहभागिता रहेको थियो ।
