काठमाडौं । प्रतिनिधि सभाको बैठक आज बस्दै छ । उक्त बैठकमा एमसीसीको बिषयमा छलफल हुने भएको छ । यसअघि नै अमेरिकी सहयोग परियोजना (एमसीसी) टेबुल भइसकेको छ । संसद सचिवालयले हिजो सार्वजनिक गरेको सम्भावित कार्यसूचीमा एमसीसीमा छलफल हुने प्रस्ताव राखेको छ ।
सरकारको नेतृत्वकर्ता दल नेपाली कांग्रेसले आफ्ना सांसदहरुलाई आज अनिवार्य उपस्थितिका लागि निर्देशन समेत दिएको छ । सत्तामा रहेका दल र प्रतिपक्षमा रहेका दलबीच एमसीसी पारित गर्ने बिषयमा अझै सहमत हुन सकेको छैन् ।एमसीसीको बिषयमा सत्तापक्ष नेपाली काँग्रेस पास गरेरै छाड्ने पक्षमा देखिएको छ । तर, सत्तापक्षकै अन्य दल नेकपा माओवादी केन्द्र र नेकपा एकीकृत समाजवादी दलले भने एमसीसी संसदमा टेबुल हुन दिएपनि पास हुन भने नदिने जनाएका छन् ।
एमसीसीका बिषयमा नेकपा एमालेले भने अझैसम्म खुुलेर समर्थन वा विरोध गर्ने भन्ने बारेमा निर्णय गरिसकेको छैन् । एमसीसीको बिषयमा नेपाली काँग्रेसका सभापति तथा प्रधानमन्त्री शेरबहादुर देउवा र नेकपा एमालेका अध्यक्ष केपी ओलीबीच गोप्य बैठक कहिले बालुबाटार त कहिले बालकोटमा हुँदै आएको छ । तर, एमसीसीका बिषयमा एमालेले अझै निर्णय गर्न सकेको छैन् । मेरोलगानी ।
