पर्वत। पर्वतको कुश्मा बजारमा आज बिहानै चितुवा देखा प¥र्यो । चितुवा बजार छिरेको थाहा पाएपछि कुश्माबासीहरु “बाघ आयो रे बाघ” भन्दै तँछाडमछाड गर्दै कुश्मा नगरपालिका–४ भण्डारी टोलमा पुगे ।
पहिले बारीको टनेलभित्र पसेको चितुवा मान्छेको भिड् देखेपछि भाग्नलाई बाटो खोज्यो । र, त्यसपछि छेउमा अवस्थित ओम बहादुर रेग्मीको पहेँलो घरको भान्छा कोठामा पस्यो । नेपाल प्रहरी, सशस्त्र प्रहरी र वनका कर्मचारी तैनाथ भैसकेका थिए । घरका परिवारलाई बाहिर निकालेर प्रहरीले ढोकामा चापी लगायो ।
“करिब ३ घण्टामा चितुवालाई सकुशल नियन्त्रणमा लियौँ । जिल्ला प्रहरी कार्यालय पर्वतको प्रहरी निरीक्षक प्रकाश राउतले भन्नुभयो, “कुनै पनि अप्रिय घटना हुन पाएन । पोखरा वन कार्यालयको उद्धार टोलीले चितुवालाई सुरक्षित तरिकाले नियन्त्रणमा लिएर पोखरा लगिसकेको छ ।” चितुवा हेर्न आउनेको भिड् हटाउन प्रहरीलाई मुस्किल परेको थियो ।
डिभिजन वन कार्यालय पर्वतमा चितुवा नियन्त्रण गर्न सक्ने विशेषज्ञ टोली र आवश्यक उपकरण नभएपछि कास्कीबाट आएको टोलीले चितुवा नियन्त्रणमा लिनु परेको थियो । “हामीले भेटनरी डाक्टर, वन अधिकृत र सशस्त्र वन रक्षक टोलीसहित वन्यजन्तु एम्बुलेन्स पठाएका थियौँ ।” वन कार्यालय कास्कीका सहायक वन अधिकृत शालिकराम पराजुलीले भन्नुभयो, “भान्छा कोठाको ढोकामा खोर राख्यौँ र छेउको झ्यालबाट जिस्काएपछि चितुवा खोरमा पस्यो । बेहोस नबनाईकनै सकुशल नियन्त्रणमा लिन सक्यौँ ।”
नियन्त्रित चितुवालाई प्राकृतिक वासस्थानमा नै छाडिने वन कार्यालय कास्कीका सहायक वन अधिकृत पराजुलीले जानकारी दिनुभयो । “भाले चितुवा भएको भए कास्की वन्यजन्तु उद्धार केन्द्र«मा राख्ने सोचेका थियौँ । तर, त्यो पोथी चितुवा रहेछ । हामी सँग पोथी चितुवा भएकै स्थितमा फेरि अर्को पोथी चितुवालाई साथमै उद्धार केन्द्र«मा राख्न सक्दैनौँ ।
चितुवाको कारण पर्वत सामाजिक सञ्जालमा चर्चित बन्ने गरेको छ । डेढ वर्ष अघि पनि पर्वतमा बिरामी अवस्थामा रहेको चितुवाको घाँटीमा डोरीले बाँधेर बजार घुमाएको भिडिओ र तस्बिर सामाजिक सञ्जालमा भाइरल भएको थियो । दुई हप्ता अघि पनि फलेवासमा मान्छेले चितुवालाई बोकेर गाउँ डुलाएको भिडियो र तस्बिरहरू सामाजिक सञ्जालमा भाइरल भएका थिए । तर, चितुवा जिउँदो नभएर मरिसकेको स्थित थियो ।
