काठमाडौं । सरकारले राजदूतमा सिफारिस गरेका तीन जनाको संसदीय सुनुवाइ प्रक्रिया सुरू भएको छ। बेलायतको राजदूतमा ज्ञानचन्द्र आचार्य, भारतको राजदूतमा शंकरप्रसाद शर्मा र अमेरिकाको राजदूतमा श्रीधर खत्रीलाई पठाउन गत कात्तिक ११ को मन्त्रिपरिषदबाट सिफारिस भएको थियो। उनीहरूलाई राजदूतमा सिफारिस गरेको जानकारी कात्तिक १२ मा संसदीय संसद सचिवालयमा पुगेको थियो।
संघीय संसद सचिवालयले आज सूचना निकालेर राजदूत पदमा नियुक्तिका लागि सिफारिस भएकाहरूविरूद्ध उजुरी भए दिनका लागि आह्वानसमेत गरेको छ। राजदूतमा पदमा उनीहरूलाई नियुक्त गर्न उपर्युक्त छैन भन्ने लागेमा स्पष्ट आधार र प्रमाणसहित कात्तिक २६ गतेभित्र संसदीय सुनुवाइ समितिको कार्यालयमा उजुरी दिनसमेत भनिएको छ। प्रस्तावित राजदूतहरूविरूद्ध उजुरी आएपछि त्यो अध्ययन गरेर संसदीय सुनुवाइ समितिले अनुमोदन गर्ने वा नगर्ने निर्णय गर्ने गर्छ। सेतोपाटी ।
