पत्रकार महासंघ ललितपुरले अद्यावधिक कार्ययोजना बनाएर काम गर्ने

ललितपुर । नेपाल पत्रकार महासंघ, ललितपुरले अद्यावधिक कार्ययोजना बनाएर काम गर्ने भएको छ ।  शनिबार पदबहाली गरेपछि बसेको पहिलो बैठकले अल्पकालीन, मध्यकालीन र दीर्घकालीन कार्ययोजना बनाइ काम गर्ने निर्णय गरेको हो ।   त्यसका लागि विज्ञ टोली, महासंघका सल्लाहकार, तीनवटै निर्वाचन क्षेत्रका सांसद र जिल्लाका ६ वटै स्थानीय तहसँग सुझाव र सल्लाह लिएर कार्ययोजना बनाइने अध्यक्ष सागर न्यौपानेले जानकारी दिए । ‘ललितपुर पत्रकार महासंघ शाखाले अद्यावधिक कार्ययोजना बनाएर काम गर्ने निर्णय गरेको छ । विज्ञ, जनप्रतिनिधि, सांसद र अनुभवी पत्रकारको सहयोग लिएर अल्पकालीन, मध्यकालीन र दीर्घकालीन योजना निर्माण गरि सोहि आधारमा काम गरिनेछ’ न्यौपानेले भने । महासंघले जिल्लामा रहेका महिला पत्रकार र सञ्चारमाध्यममा महिलाको स्थिति समेत अध्ययन गर्ने निर्णय गरेको छ भने कोरोनाका कारण जिल्लाका सञ्चार गृहमा कार्यरत पत्रकारले भोगेका समस्या  र मिडियाको अवस्था बारेको अध्ययन गरेर प्रतिवेदन बनाउने भएको छ । त्यसका लागि सचिव रामहरी कार्कीको संयोजकत्वमा ५ सदस्यीय उपसमिति बनाएको छ । सो प्रतिवेदनलाई पत्रकार महासंघ, प्रेस काउन्सिल नेपाल र सूचना विभागमा अध्ययन गर्न पठाइने न्यौपानेले बताए ।