काठमाडौं । प्रधानमन्त्री केपी शर्मा ओलीको कदमको विरुद्धमा मधेशी नागरिक समाजले अभियान सञ्चालन गरेको छ । झापाको भद्रपुरबाट शुरु भएको अभियान वीरगञ्जमा गएर टुगिंने कार्यक्रमको संयोजन गरिरहेका लेखक एवं राजनीतिकर्मी रामरिझन यादवले बताए । हिजोबाट शुरु भएको कार्यक्रम १५ दिनसम्म चल्नेछ । हुलाकी राजमार्गमा सो अभियान सञ्चालन हुने बताइएको छ । झापदेखि वीरगञ्जसम्म ३५ वटा कार्यकक्रम तय भएको छ । त्यसमध्ये चारवटा कार्यक्रम मात्र महेन्द्र राजमार्गमा हुने उनले बताए । सबै कार्यक्रमको मुख्य वक्ता नागरिक अगुवा कृष्ण पहाडी हुने बताइएको छ । प्रधानमन्त्री ओलीले संसद् विघटन गरी संघीयता र लोकतान्त्रलाई धरापमा पारेको र त्यसका लागि तराई मधेशको दक्षिणीबेल्टमा जागरण फैलाउन यो कार्यक्रमको आयोजना गरिएको बताइएको छ । नेपाल कम्युनिस्ट पार्टी (नेकपा) ओली समूहका अध्यक्ष समेत रहेका प्रधानमन्त्री ओलीले संसद् विघटन गरेर जनतामा अनेक भ्रम छर्ने काम गरिरहेको र ओलीले परिवर्तनलाई पनि समाप्त गर्ने प्रयास गरेको कारण यो अभियान सञ्चालन गरेको उनले बताए । ठाउँ ठाउँमा हुने अन्तरक्रिया कार्यक्रम तथा गोष्ठीमा त्यहाँका नागरिक समाज, वुद्धिजिवी, पत्रकार, राजनीतिक दलका नेताहरुलाई समेत आमन्त्रित गर्ने योजना रहेको उनले बताए । वीरगञ्जसम्मको कार्यक्रम सफल भएपछि पश्चिम तराईको कार्यक्रमको तयारी गर्ने उनले बताए । रातोपाटी ।
