महेन्द्र जिसी
पर्वत । पर्वतमा कृषि यान्त्रिकीकरण अनुदानमा दुरुपयोग भएको पाइएको छ । फलेवास नगरपालिका–४ मुडिकुवामा विभिन्न समूहलाई उपलब्ध गराइएको मिनिटेलर हलोको दुरुपयोग भएको हो ।
पहिल्यै नै अनुदानमा मिनिटेलर हलो पाइसकेका किसानहरूले यस पटक फेरि अनुदानमै मिनिटेलर हलो बुझेका थिए । तर, उनीहरूले आफूले मिनिटेलर हलोको प्रयोग नगरेर अर्कैलाई विक्री गरेका हुन् ।
किसानले खेतीका लागि समूह बनाएपछि प्रधानमन्त्री कृषि आधुनिकीकरण परियोजना कार्यान्वयन ईकाइ बागलुङले किसानको समूहलाई मिनिटेलर हलो उपलब्ध गराउने गर्छ । चालु आर्थिक वर्षमा पनि मुडिकुवामा रहेका विभिन्न कृषि समूहलाई जम्मा १२ ओटा मिनिटेलर हलो वितरण गरिएको थियो । तर, त्यसमध्ये २ ओटा मिनिटेलर हलो चाहिँ समूह बाहिरका व्यक्तिलाई विक्री गरेको भेटिएको हो ।
अनुदानमा पाएको कृषि सामाग्रीको दुरुपयोग बारेमा स्थानीयले कृषि ज्ञान केन्द्र पर्वतमा उजुरी गरेका थिए । सोही आधारमा अनुगमनमा पुग्दा श्रीसुवा कृषि उपज तथा सिँचाई समूह र ठुमी कृषक महिला समूहलाई उपलब्ध मिनिटेलर हलो सिँचाइ समूहका अध्यक्ष गणेश भुसाल र महिला समूहका सदस्य दिल बहादुर कुँवरले विक्री गरेका हुन् ।
कृषि ज्ञान केन्द्र पर्वत र प्रधानमन्त्री कृषि आधुनिकीकरण परियोजना कार्यान्वयन ईकाई बागलुङले अनुगमन गरेको थियो । अनुगमन टोलीले अनुदान प्राप्त उपकरण अन्यत्र विक्री वितरण गर्ने समूहलाई कालो सुचीमा राखेर कारबाही गरिने कृषि ज्ञान केन्द्रकी प्रमुख मनिता थापाले बताइन् ।
मुडिकुवामा चालु आर्थिक वर्षमा प्रधानमन्त्री कृषि आधुनिकीकरण परियोजना कार्यान्वयन ईकाइ बागलुङ सामुदायिक कृषि विकास समूह, गौँडा बञ्चासे कृषक समूह, श्रीसुवा कृषि उपज तथा सिँचाई समूह र थुमी कृषक महिला समूहलाई १२ थान मिनिटेलर हलो अनुदानमा वितरण गरेको थियो ।
