पर्वत । वैशाख ३० गते हुने स्थानीय तहको चुनावी तालमेललाई लिएर पर्वतमा रहेका गठबन्धन दलहरू बिचमा सहमति नबनेपछि एक्ला एक्लै चुनावी मैदानमा जाने निश्चित देखिएको छ ।
धेरै पटक गठबन्धन दलका प्रमुखहरू बसेर सहमति खोज्ने प्रयास गरेको भए पनि नेकपा माओवादी र एकीकृत समाजवादीले दुई वटै नगरपालिकामा आ–आफ्नै दाबी गरेपछि बैठकहरू निष्कर्ष विहीन बन्दै आएको हो ।
आज पनि अन्तिम समयसम्म सहमतिको प्रयास गरेको भए पनि माओवादी र समाजवादीले मतभार भन्दा बढी पदमा आकाङ्क्षा राखेको हुँदा गठबन्धन गरेर जाने सम्भावना नदेखिएको काँग्रेसका प्रवक्ता अच्युत तिवारीले बताए ।
बैठकमा माओवादीले कुश्मा नगरपालिका, पैयुँ गाउँपालिका र जलजला गाउँपालिका मध्ये एउटामा आफूहरूले नेतृत्व पाउनु पर्ने अडान राख्दै आएको छ । एकीकृत समाजवादी चाहिँ कुनै पनि हालतमा फलेवास नगरपालिका आफूहरूलाई छाड्नुपर्ने बताउँदै आएको छ ।
यता नेपाली काँग्रेसले भने कुश्मा नगरपालिका र फलेवास नगरपालिका कुनै पनि हालतमा नछाड्ने अडान राख्दै आएको छ । त्यति मात्र होइन काँग्रेसले जिल्लामा रहेका पाँच वटा पालिकामा समेत उपाध्यक्ष अन्य दललाई दिएर अध्यक्ष आफै सँग हुनुपर्ने छलफल चलाउँदै आएको छ ।
