पर्वत । कुश्मा नगरपालिका २ सहश्रधाराकी ५६ वर्षीया देवी कुमारी पौडेलको हातमा जग्गा धनीको लालपुर्जा छ । तर, उनको जग्गामा पुर्वप्रधानपञ्च तेजनाथ रिजालको घर ठडिएको छ ।
उनको २ हजार ४ सय ७ कित्ता नम्बरको जग्गामा रिजालले बनाएको घर हटाई पाऊँ भन्दै पर्वत जिल्ला अदालतमा मुद्दा हालिन् । तर, अदालतको विवादास्पद फैसलाका कारण उनले आफ्नै जग्गा पाउन पनि रोइकराई गर्दै हिँड्नु परिरहेको छ ।
एकल महिला देवी कुमारी पौडेलले न्याय पाउने आसमा २०७२ सालमा आफ्नो जग्गामा बनेको घरको भाडा दिलाई घरबाट हटाई पाऊँ भनेर सासु कौशिला पौडेल मार्फत अदालतमा मुद्दा हालिन् ।
तर, तत्कालीन जिल्ला न्यायाधीश मोहनराज भट्टराईले प्रतिवादी तेजनाथ रिजाललाई नै फाइदा पुग्ने गरी २०७३ मा फैसला सुनाइदिए । फैसलामा जग्गाको स्वामित्व वादीको नै रहेको र प्रतिवादीको उक्त घर रहेसम्म सो घर प्रतिवादीले नै चीर भोगको आधारमा भोग गर्न पाउने निर्णय गरिएको छ ।
