पोखरा । नेकपा एमाले पोखरा महानगर कमिटीको अध्यक्षमा दिलिप न्यौपाने सर्वसम्मत निर्वाचित भएका छन्। महानगर कमिटी अध्यक्षका अन्य ४ जना उम्मेदवारले मनोनयन फिर्ता लिएपछि न्यौपाने सर्वसम्मत भएका हुन्। अध्यक्षका लागि तेजनारायण अधिकारी, धनबहादुर नेपाली, हरिप्रसाद त्रिपाठी र दीपक पौडेल उम्मेदवार थिए। उनीहरूलाई प्रदेश कमिटी र अन्य स्थानमा जिम्मेवारी दिने गरी सहमति गरेको अध्यक्ष मण्डलका एक सदस्यले जानकारी दिए।
अध्यक्षमा सर्वसम्मत बनेका न्यौपाने अनेरास्ववियुका केन्द्रीय सदस्य, तत्कालीन पश्चिमाञ्चल ब्युरो प्रमुख, एमाले जिल्ला कमिटीका विद्यार्थी फाँटका इन्चार्ज र पोखरा नगर कमिटीका सचिव भएर काम गरिसकेका छन्। अध्यक्षका आकांक्षी धेरै भएकाले अधिवेशन मंगलबार सुरू भए पनि बिहीबारमात्र अध्यक्षमा न्यौपाने सर्वसम्मत भएका हुन्। अध्यक्षका उम्मेदवारमा न्यौपाने केन्द्रीय सदस्य खगराज अधिकारीनिकट हुन्। उनलाई केन्द्रीय सचिव पृथ्वीसुब्बा गुरूङ समूहले समर्थन जनाएपछि अध्यक्षमा सर्वसम्मत बनेका हुन्। महानगर कमिटीका पदाधिकारी र सदस्यमा समेत सर्वसम्मत बनाउन छलफल भइरहेको एमाले कास्कीले जनाएको छ। सेतोपाटी ।
