पर्वत । पर्वतको पैयूँ गाउँपालिका वडा नम्बर–५ को कार्यालयले स्थानीयको घर निर्माण गरिदिने देखि बिजुली बत्तीको रकम आफै तिरिदिने गरेको छ ।
निर्वाचित भएर आएपछि वडा अध्यक्ष नारायण भुर्तेलले गाउँमा घर नभएकाहरूको घर निर्माण गरिदिने बताउनु भएको थियो । त्यही अनुसार अति विपन्न परिवारलाई तीन वटा घर निर्माण र शौचालय नभएका दश घरमा शौचालय समेत निर्माण गरिदिएको वडा अध्यक्ष भुर्तेलले जानकारी दिए ।
वडामा रहेका सबै ३ सय ५० घरधुरीको बिजुली बत्तीको मासिक शुल्क पनि वडा कार्यालयले बेहोर्दै आएको छ । “वडावासीहरूले घरमा बत्ती बालेबापत न्यूनतम शुल्क तिर्दै आउनु भएको थियो । तर, हामी निर्वाचित भएर आएदेखि उहाँहरूले तिर्ने रकम वडाले बेहोर्दै आएको छ ।”, उनले भने, “नागरिकले थोरै रकम तिर्नको लागि पनि झन्झट र अनावश्यक समय खर्च हुने देखेपछि नागरिकले उठाउँदै आएको बोझ हामी आफैले बोकेका हौँ ।”
वडा अध्यक्ष भुर्तेलका अनुसार वडावासीहरूले पैयूँ क्षेत्र ग्रामीण सामुदायिक विद्युतमा वार्षिक २ लाखको हाराहारीमा विद्युत् महसुल शुल्क बुझाउँदै आएका थिए ।
