पर्वत । झट्ट हेर्दा पर्वत काँग्रेसमा व्यक्ति हारेको जस्तो देखिन्छ । तर, त्यो हेराई र बुझाई चाहिँ गलत हो । यहाँको काँग्रेसीमा एउटा प्रवृत्ति यस्तो बस्यो कि त्यो या यो पात्र हराउनै पर्छ । चाहे काँग्रेस नै किन सकियोस् ।
अब यही अवस्थामा पर्वत काँग्रेसले कुनै पनि चुनाव जित्ने छैन । टिकट ल्याउने र नपाउने जमातहरू जति छन् उनीहरूबाट आज पनि र भोलि पनि पर्वत काँग्रेसको जित कुनै मानेमा सम्भव छैन ।
मान्छेको धेरथोरै स्वभाव के हो भने आफूलाई घात गर्नेहरु सँगको बदला हरपल चाहि रहेको हुन्छ । जुन यही चुनावमा पनि प्रस्फुटित भएकै छ । भोलिका दिनमा अर्को आउँदै गर्दा हुने पनि यही नै हो । जुन प्रस्ट नै छ ।
यदि पर्वत काँग्रेसले जित्ने नै हो भने अहिले देखिएका, मानिएका सबै नेताहरूले सक्रिय राजनीतिदेखि बिदा लिएर अभिभावकत्व नलिनुको विकल्प छैन ।
अब पहिलो र दोस्रो घेरा बाहिरबाट आगामी चुनावका लागि उम्मेदवार निकाल्न सक्नुपर्छ । त्यो हिम्मत गर्न सकिएन भने उही सँधैको घात र प्रतिघातको सामना गर्न तयार भएर बस्नु बाहेक कुनै औचित्य रहने देखिँदैन । टिप्पणी – सुमन जंग
