डडेल्धुरा। बैतडीमा स्वाब संकलन गर्न हिँडेका स्वास्थकर्मीमाथि हातपात भएको छ । जिल्लाको सिगास गाउँपालिका- ३ बल्लेखान आधारभूत स्वास्थ्य केन्द्रका स्वास्थकर्मीमाथि हातपात भएको हो ।
बल्लेखान स्वास्थ्य केन्द्रबाट वडा नम्बर ५ ढुंगाडमा स्वाब संकलनका लागि हिँडेका स्वास्थ्यकर्मी भुपेन्द्र बोहरामाथि सोमबार हातपात भएको हो ।
भूमिराज आधारभूत विद्यालयमा वन सम्बन्धि बैठक चलिरहेको समयमा सामाजिक दूरी र स्वास्थ सुरक्षा सतर्कता अपनाउन आग्रह गर्दा भानसिंह बोहराले हातपात गरेको स्वास्थ्यकर्मी बोहराले बताए । उनले भानसिंहले मदिरा पिएर गरेर गालीगलौज गरिरहेकाले आफूले सम्झाउँदा हातपात गरेको बताए ।
सिगास गाउँपालिका- ५ मा आज स्वाब संकलन गर्न हिँडेका स्वास्थ्यकर्मीमाथि बाटोमै हापात भएपछि स्वाब संकलन कार्यसमेत रोकिएको ढुंगाड स्वास्थ्यचौकीका इन्चार्ज हेमन्तसिंह साउँदले बताए ।
स्वास्थ्यकर्मीको घाँटी, खुट्टा र पाखुरा चोट लागेको छ । स्थानीयले आफूमाथि हातपात गरेपछि गाँजरी प्रहरी चौकीमा निवेदन दिएको स्वास्थ्यकर्मी बोहराले बताए ।
